December Aan Pohancha Ha

 

Abhi Hijr Ka Qayaam Hai Aur December Aan Pohancha Hai
Ye Khabr Shahar Mein Aam Hai December Aan Pahuncha Hai !

Aangan Mein Utar Aayi Hai Manoos Si Khushboo
Yadoun Ka Azdahaam Hai December Aan Pahuncha Hai !

Khamoshiyon Ka Raaj Hai, Khizaan Taak Mein Hai
Udasi Bhi Bahot Aam Hai December Aan Pahuncha Hai !

Tere Aanay Ki Ummeed Bhi Ho Chuki Ma’adoom
Naye Saal Ka Ehtamaam Hai December Aan Pahuncha Hai !

Khunak Rut Mein Udaasi Bhi Chaukhat Pe Kharri Hai
Jaarrey Ki Udaas Shaam Hai December Aan Pahuncha Hai

Tum Aao Tou Merey Mausamon Ki Bhi Takmeel Ho Jaye
Nayi Rut Tou Sar-e-Baam Hai December Aan Pahuncha Hai!

December Mujh Se Bolaa Tha

December Mujh Se Bolaa Tha
Ab Ke Jab Mai Aaon Ga
Tujhe Phir Se Pukaron Ga
Ussey Mai Sath Laon Ga

Jo Tujh Ko Bhool Baitha Hay
Ke Jis Ke Hijr Ka Laawa
Tera Tan Man Jalata Hy
Ke Jis Ki Yaad Ki Jheelon Mein
Akser Doob Jatey Ho

Ke Jis Ke Waastey Baithey
Yaahan Tum Geet Gaatey Ho!

December Mujh Se Bolaa Tha
Suno Tum Bhool Na Jana
Jo Yaadein Us Ne Sonpi Hain
Jo Lamhay Us Ne Bakhshey Hain

Chaahe Ye Zakhm Saary
Rooh Ka Naasoor Ban Jaaen
Inhen Barhney Nahi Dena

Inhen Marney Nahi Dena !!

December Nahin Ruka

Lambay Safar Ki Oat Mein Pal Bhar Nahin Ruka
Mein Waqt Ke Fareeb Mein Aa Kar Nahin Ruka

Phir Aa Gaya Aik Naya Saal Dosto !
Is Bar Bhi Kisi Say December Nahin Ruka

Lay Kar Kisi Ne Haath Mein Waqt Ka Kashkol 
Aisa Safar Kia Ke Kahin Per Nahin Ruka

Manzar Ke Aks Mein Koi Chehra Chatakh Gaya
Sheeshe Ke Pas Aa Kay Jo Pathar Nahin Ruka

Chalta Raha Adoo Ki Safain Rondta Howa !
Lakhon Ka Khoun-e-jigar KarKe Bhi Lashkar Nahin Ruka

Bas Yeh Howa Ke Aakhri Lamha Bhi Aa Gaya
Dil Ka Tawaf-e-Koocha-e-Dilbar Nahin Ruka!

December Ab Ke Aao

December Ab Ke Aao Tou
Tum Us Shehar-e-Tamanna Ki Khabar Lana
Ke Jis Mein Jugnuon Ki Kehkashaan Jhilmilaati Hai
Jahan Titlee Ke Rangoon Se Fizaain Muskarati Hain
Wahan Charon Taraf Khushboo Wafa Ki Hai

December Ab Ke Aao Tou
Tum Us Shehar-e-Tamanna Ki Khabar Lana
Jahan Par Rait Ke Zarray Sitaray Hain
Gul-o-Bulbul, Mah-o-Anjum Wafa Ke Ista’aray Hain
Jahan Dil Woh Samandar Hai

Jis Ke Kayi Kinaray Hain !!

December Hum Say Na Poocho

Hamaray Shehar Ki Baabat
Yahan Aankhon Mein Guzray Karwan Ki Gard Thehri Hai
Muhabbat Barf Jaisay Hai Yahan
Yahan Dil Ke Lahu Mein
Apni Palkon Ko Dabo Kr Hum
Sunehray Khawb Buntay Hain
Phir Unhi Khawbon Mein Jeetay Hain
Unhi Khawbon Pe Martay Hain
Dareeda Rooh Ko Lafzon Se Seena Gou Nahee Mumkin
Magar Phir Bhi…

December Ab Ke Aao Tou
Tum Us Shehar-e-Tamanna Ki Khabar Lana !!

Sab Ka Dard December Tha

Bas Ek Meri Baat Nahi Thi, Sab Ka Dard December Tha

Barf Ke Shehr Mien Rehne Wala Ek Ek Fard December Tha

Pichhle Saal Ke Aakhir Mien Bhi Hairat Mien Hum Teeno Thay

Ek Mien Tha, Ek Tanhyai Thi, Ek Be-dard December Tha

Apni Apni Himmat Thi, Aur Apni Apni Qismat Thi !

Hath Kisi Ke Neeley Thay, Aur Peela Zard Dember Tha

Phooloun Pe Tha Sakta Taari, Khushbu Sehmi Sehmi Thi

Khof-zda Tha Gulshan Sara, Dehshat-gard December Tha..

December Yaad Aata Hai

Hawa Ka Sard Jhonka Jab

Mujhy Chhoo Ke Guzarta Hai

Meri Sochoun Ke Darpan Men 

December Ki Chatakhti Dhoop...

Ek Chehra Banati Hai !!

Thithertey Sard Mausam Mein

Saba Jab Gungunati Hai

Hawa Seeti Bajati Hai

Tou Yun Lagta Hai..

College Ki Canteen Mein Bethi

Wo Phir Se Muskurati Ho

Meri Coffee Ki Piyaali Se

Dhuwein Ke Garam Badal Ne

Koi Surat Banai Ho…

Koi Khushbu Ki Surat Baat

Nihaan Thi Jo Mere Dil Mein
Meri Aankhoun Se Parrh Ker

Wo Zara Sa Muskurai Ho

Bas Ek Wo Khwaab Sa Lamha

December Ki Khunk Raatoun Mein

Aksar Yaad Aata Hai

Nahi Bhoola Jisey Ab Tak

Wo Manzar Yaad Aata Hai

December Yaad Aata Hai…..

Suno December !

Suno December !

Ussay Pukaaro!

Ussay Bulaaoo!

Suno December

Ussay Mila Do…

Ab Is Se Pehle Ke Saans Nikle

Ab Is Say Pehlay Ke Saal Guzre

Wohi Lakeerain Wohi Sitaara

Meri Lakeeroon Mein Qaid Kar Do

Ya Aakhri Shab Ke Aakhri Pal

Koi Bara Ikhtitaam Kar Do….!!

Yeh Zindagi Bhi Tamaam Kar Do

Suno December !!

Ussay Mila Do!

December

Kabhi jo toot ke barsa December
Laga apna, Bohat apna December

Guzar jata hai sara saal yun tou
Nahin kat’ta magar tanha December

Bhala barish say kia sairaab hoga
Tumharay wasl ka piyasa December

Woh kab bichrra? Nahi ab yaad lekin
Bus itna yaad hai ke tha December

Jama poonji yehi hai umar bhar ki
Meri tanhai aur Mera December!